Беларусь не прызнала дакладчыка ААН

charter97.org

Рашэньне аб прызначэньні Харашці спэцдакладчыкам па Беларусі было прынята 28 верасьня на 21-й сэсіі Савета па правах чалавека (СПЧ) ААН у Жэнэве. Супраць гэтага рашэньня выступілі некалькі краін, у тым ліку Расея й Куба.

Прадстаўнік РФ нагадаў, што расейская дэлегацыя яшчэ на 20-й сэсіі СПЧ ў чэрвені гэтага года галасавала супраць прыняцьця рэзалюцыі па Беларусі, якая прадугледжвала ўвядзеньне мандата спэцдакладчыка. "Лічым яе прадузятай і контрпрадуктыўнай, накіраванай на ізаляцыю Беларусі, а не ўцягваньне яе ў дыялёг. З улікам выкладзенага мы не падтрымліваем ні аднаго з кандыдатаў на пасаду спэцыяльнага дакладчыка па становішчы ў галіне правоў чалавека ў Беларусі", - заявіў прадстаўнік расейскай дэлегацыі.

Беларусь не прызнае рашэньне Савета СПЧ аб увядзеньні мандата спэцдакладчыка й ня мае намеру зь ім супрацоўнічаць, заявіў на сэсіі пастаянны прадстаўнік Беларусі пры ААН і іншых міжнародных арганізацыях у Жэнэве Міхаіл Хвастоў.

Паводле яго слоў, Харашці з улікам яго палітычнага мінулага ня зможа бесстароньне й аб'ектыўна ажыцьцяўляць свае функцыі на пасадзе спэцдакладчыка Савета ААН па правах чалавека.

"Мы працягнем ахоўваць правы чалавека ўладай закону, а не адчуваньнямі спэцдакладчыка, - заявіў Хвастоў. - Ні адзін з міжнародных дагаворных ці іншых кантрольных органаў ААН не заявіў, што правы чалавека ў Беларусі забясьпечваюцца горш, чым у Вугоршчыне (радзіма Харашці. - БелаПАН. ), Польшчы, Латвіі, на Кіпры або ў Канадзе. Адпаведна ініцыятыву ЭЗ ў Савеце па правах чалавека ў дачыненьні да Беларусі мы разглядаем як палітычную кампанію ЭС супраць Беларусі ".

На думку Хвастова, уся праца Харашці будзе пастаўлена ў прамую залежнасьць ад пазыцыі Брусэля.

БелаПАН, ав