Упаўнаважаны заступіўся за дзяцей

Упаўнаважаны па справах дзяцей заклікае спыніць выкарыстоўваньне адмоўных і прыніжальных акрэсьленьняў у дачыненьні да дзяцей, зачатых у выніку экстракарпаральнага апладненьня.

У сваёй заяве Марэк Міхаляк напісаў, што зь неспакоем і абурэньнем заўважае, як у грамадзкай прасторы, асабліва ў СМІ, зьяўляюцца выказваньні, якія ставяць пад сумнеў годнасьць дзяцей, зачатых шляхам in vitro.

Упаўнаважаны падкрэсьліў, што „гэта надзвычай шкодная, крыўдная й цалкам нягодніцкая зьява, тым больш, што датычыць самых маленькіх і безабаронных" грамадзянаў Польшчы.

Марэк Міхаляк заклікаў адмовіцца ад „гэтай непрыстойнай практыкі, якая кляйміць дзяцей і крыўдзіць іх і іхныя сем’і”.

Упаўнаважаны адзначыў, што гэтыя дзеці як і ўсе астатнія павінны расьці ў атмасфэры любові, міру й бясьпекі.

аз