Саньнікаў раскрытыкаваў «Больш Эўропы для Беларусі»

Лідар «Эўрапейскай Беларусі» запрапанаваў свой плян вызваленьня палітвязьняў, якія «зьяўляюцца ўсяго прыкрай перашкодай на шляху да аднаўленьня папярэдніх стасункаў». «Цалкам відавочна, што сёньня ў Эўропе зноў спрабуюць вярнуцца да ня раз выпрабаванага й і ня раз правальнага сцэнара дыялёгу з дыктатарам. Некаторыя эўрапейскія палітыкі й чыноўнікі ЭЗ «моцна стаміліся» адстойваць свае жа прынцыпы свабоды, дэмакратыі й правоў чалавека ў Беларусі», - заявіў Саньнікаў.

Палітык адзначыў, што вядуцца гульні са сьпісамі палітзьняволеных, у якія ўцягнуліся таксама беларускія праваабарончыя арганізацыі.

Як адзначае Саньнікаў, заява лідараў Руху «За свабоду», кампаніі «Гавары праўду» й партыі БНФ зроблена невыпадкова.

«У Брусэлі адбудзецца стратэгічнае пасяджэньне па Беларусі. Рашэньне аб аднаўленьні дыялёгу з дыктатарам некаторымі эрачыноўнікамі ўжо падрыхтаваныя. Патрэбен «голас грамадзкасьці» зь Беларусі. І гэты голас не прымусіў сябе чакаць у выглядзе заявы трох аб неабходнасьці ўзнаўленьня «поўнамаштабнага дыялёгу» з дыктатарам», - адзначыў Саньнікаў.

Паводле яго слоў, ні «Эўрапейскую Беларусь», ні яе непасрэдных саюзнікаў на гэтую сустрэчу не запрашалі й зрабілі ўсё, каб іх там не было».

Паколькі сёньня «Эўрапейскай Беларусі» у Брусэлі ня будзе, Андрэй Саньнікаў зрабіў «сустрэчную прапанову» Эўразвязу: «Запатрабуеце неадкладнага вызваленьня ўсіх 13-ці палітвязьняў і да іх вызваленьня спыніце ўсе адносіны з дыктатурай, прыпыніце гандаль нафтапрадуктамі й імпарт калійных угнаеньняў, замарозьце банкаўскія рахункі, не прымайце эмісараў дыктатуры й не адпраўляйце сваіх. Паверце, гэта спрацуе, калі вы сапраўды хочаце дапамагчы вызваленьню палітвязьняў».

паводле Хартыі/ав