Азараў дамагаецца выключэньня са сьпісу санкцый ЭЗ

Эўрапейскія дыпляматы сьцьвярджаюць, што экс-прэм'ер Украіны Мікалай Азараў дамагаецца выключэньня яго прозьвішча са сьпісу санкцый ЭЗ, уведзеных супраць падазраваных у незаконным прысваеньні дзяржаўных сродкаў, паведамляе эўрапейскае выданьне EUobserver.

Па дадзеных выданьня, нямецкая адвакацкая кампанія Alber&Geiger прадстаўляе інтарэсы двух украінцаў, якія дамагаюцца размарожаньня актываў у ЭЗ. Тры дыпляматычныя крыніцы пацьвердзілі, што яшчэ 5 сакавіка ў адрас Рады ЭЗ паступіў запыт ад імя Азарава і "чальцоў яго сям'і", што дазволіла выданьню зрабіць выснову, што гаворка ідзе пра экс-прэм'ера і яго сына Аляксея, які таксама патрапіў у чорны сьпіс. Запыт, па інфармацыі дыпляматаў, разглядае працоўная група Рады ЭЗ па Ўсходняй Эўропе, Паўднёвым Каўказе і Цэнтральнай Азіі (COEST).

Згодна з нормамі ЭЗ, выключэньне са сьпісу санкцый павінна быць адобранае ўсімі краінамі-сябрамі Эўразьвязу. Калі краіны адмовяць пазоўнікам, то яны могуць зьвярнуцца ў суд ЭЗ у Люксембургу.

эб/ria.ru