У Польшчы ўзьнікне Міграцыйны крызысны цэнтар

У Польшчы ўзьнікне Міграцыйны крызысны цэнтар. Пра гэта заявіў кіраўнік міністэрства ўнутраных спраў і адміністрацыі Марыюш Блашчак падчас сустрэчы міністраў унутраных спраў краінаў Вышаградзкай групы ў Варшаве. Польскі міністар падкрэсьліў, што гэткі праект падтрымліваюць усе чатыры краіны групы V4.

Цэнтар будзе каардынаваць дапамогу бежанцам за межамі Эўразьвязу, напрыклад, у лягерах у Ярданіі ці Лібане. Палітык дадаў, што гаворка ідзе пра каардынацыю дапамогі й сродкаў зь бюджэтаў краінаў, якія будуць удзельнічаць у праекце.

У сваю чаргу міністар унутраных спраў Славаччыны Робэрт Каліняк падкрэсьліў, што краіны Вышаградзкай групы будуць працягваць пераконваць іншых членаў Эўразьвязу да ідэі эфэктыўнай салідарнасьці. Паводле яго, цяперашняя сыстэма разьмеркаваньня мігрантаў у ЭЗ не працуе.

Кіраўнік славацкага МУС падкрэсьліў, што эфэктыўная салідарнасьць зьяўляецца спосабам вырашэньня міграцыйнага крызысу.

„Мы ня хочам, каб шлях міграцыі выбіралі людзі з краінаў, дзе няма вайны”, - дадаў Робэрт Каліняк.

Міністры МУС Вышаградзкай групы сустрэліся ў Варшаве таксама са сваімі калегамі з Аўстрыі, Бэльгіі, Балгарыі, Харватыі й Славеніі.

аз