«Мы не намераныя зачыняць «Белсат»

Польскія ўлады не намераныя спыняць вяшчаньня тэлеканалу Белсат і спыняць падтрымку грамадзянскай супольнасьці Беларусі ўзамен на разьвіцьцё стасункаў з беларускімі ўладамі. Пра гэта заявіў сьпікер польскага Сэнату Станіслаў Карчэўскі пасьля сустрэчы з прадстаўнікамі беларускіх апазыцыйных партыяў і рухаў, а таксама грамадзянскай супольнасьці.

Сустрэча дэлегацыі польскага Сэнату з прадстаўнікамі беларускай апазыцыі ій няўрадавых арганізацый. Менск, 6 сьнежня 2016 г.

Зь беларускага боку на сустрэчы з дэлегацыяй Сэнату Польшчы прысутнічалі прадстаўнікі Руху «За Свабоду», праваабарончага цэнтру «Вясна», партыяў БНФ і Беларуская хрысьціянская дэмакратыя. Акрамя таго, на сустрэчу з польскімі сэнатарамі былі запрошаныя першы галава беларускай дзяржавы Станіслаў Шушкевіч і незалежная дэпутатка Палаты прадстаўнікоў Алена Анісім.

«Ніякага гандлю зь беларускім урадам не было, не было такіх размоваў і такіх думак. Прадстаўнікі грамадзянскай супольнасьці выказалі падазрэньні (наконт магчымай ліквідацыі «Белсату» й скарачэньня падтрымкі іншых СМІ - А. П.), але гэтыя падазрэньні мы разьвеялі», – заявіў Станіслаў Карчэўскі.

Сьпікер Сэнату Польшчы паведаміў, што з прадстаўнікамі беларускай апазыцыі польскія парлямэнтары «правялі вельмі цікавую, і надзвычай патрэбную размову».

Дэлегацыя вышэйшай палаты польскага парлямэнту завяршае свой візыт у Беларусь. Пасьля сустрэчы з прадстаўнікамі беларускай грамадзянскай супольнасьці Станіслаў Карчэўскі наведаў філялягічны факультэт БДУ, дзіцячы анкалягічны шпіталь у Бараўлянах і ўсклаў вянкі на месцы пахаваньня ахвяраў сталінскіх рэпрэсіяў у Курапатах. На вечар заплянаваная сустрэча сьпікера польскага сэнату з прадстаўнікамі польскай нацыянальнай меншасьці ў Беларусі.

Аляксандар Папко, Менск