Пешая пілігрымка вырушыла ў Будслаў

Пачаткам паломніцтва стала сьвятая Імша, якую адслужыў Мітрапаліт Менска-Магілёўскі арцыбіскуп Тадэвуш Кандрусевіч.

Іерарх прывітаў удзельнікаў пілігрымкі і гасьцей, якія сабраліся ў сьвятыні, і заклікаў прысутных маліцца аб духоўных плёнах паломніцтва, асабліва аб новых пакліканьнях да сьвятарства і духоўнага сану.

У Будславе (Мядзельскі раён Менскай вобласці) 5—6 ліпеня адбудуцца ўрачыстасьці, прысьвечаныя 400-годдзю знаходжаньня ў гэтым горадзе абраза Маці Божай. Будслаўскія сьвяткаваньні ачоліць папскі пасол кардынал Жан-Луі Таран, «што само па сабе нагадвае пра важнасьць падзеі і таксама пра павагу як для Касьцёлу ў нашай краіне, так і да нашай бацькаўшчыны», -- падкрэсьліў арцыбіскуп Т.Кандрусевіч.

Напрыканцы Імшы, якая прайшла ў сталічным архікатэдральным касьцёле Найсьвяцейшай Панны Марыі, мітрапаліт уручыў удзельнікам паломніцтва крыж — знак веры і надзеі, які будуць несьці наперадзе пілігрымкі.

Пасьля адмысловага благаслаўленьня Мітрапаліта ХХІІІ пешая пілігрымка накіравалася ў Будслаў.

эб/catcholic.by