Садоўскую зноў будуць судзіць

Супраць Кацярыны Садоўскай зноў распачатая крымінальная справа. 68-гадовая актывістка абвінавачваецца ў зьнявазе гонару і годнасьці прэзыдэнта Беларусі. Справа распачатая на падставе запісу, які Садоўская пакінула ў красавіку гэтага году ў кнізе заўваг Савецкага суду Менску. Яна была абурана затрыманьнямі грамадзкіх актывістаў перад чэмпіянатам сьвету па хакеі і напісала “Да якіх пор суддзі будуць выконваць злачынныя ўказаньні псыхічна хворага грамадзяніна Лукашэнкі?”.

Сьледчыя палічылі, што гэтыя словы зьяўляюцца замахам на гонар, годнасьць і аўтарытэт кіраўніка дзяржавы. За такое злачынства прадугледжваецца пакараньне ў выглядзе штрафу або папраўчых работ тэрмінам да двух гадоў, абмежаваньне волі тэрмінам да трох гадоў або пазбаўленьне волі на гэты ж тэрмін.

Садоўская ўжо прыцягвалася да крымінальнай адказнасьці за зьнявагу прэзыдэнта і судзьдзі. Была прысуджана да двух гадоў калёніі. Тады яе віна заключалася ў тым, што яна патрабавала правесьці псыхіатрычную экспэртызу кіраўніка дзяржавы. Была вызвалена датэрмінова за незаганныя паводзіны.

Паводле БелаПАН/нг