Уладзімер Караткевіч вярнуўся на родную вуліцу

Гарэльеф Уладзімера Караткевіча, які некалькі месяцаў таму зьнялі з будынку Парытэтбанку на вуліцы імя Караткевіча ў Воршы, зноў зьявіўся на ранейшым месцы.

Пытаньне, чаму гарэльеф зьнялі, турбавала аршанцаў. Адказам былі тлумачэньні пра рамонт. Аднак і рамонт ужо скончыўся, а праца талачынскага скульптара Юрыя Палякова яшчэ доўга не вярталася на банкаўскі мур.

Паводле дырэктара музэйнага комплексу „Гісторыя й культура Аршаншчыны” Ўладзімера Кузубава, хвалявацца было ня варта, паколькі вяртаньне гарэльефа - гэта справа даўно вырашаная, і адбылося яно не пад ціскам абуранай грамадзкасьці Воршы, а згодна з ранейшымі дамоўленасьцямі.

Цяпер гарэльеф з выявай Уладзімера Караткевіча зноў на сьцяне Парытэтбанку. Раней гэта быў адміністрацыйны корпус аршанскага піўзаводу, зачыненага год таму.

Гэта першы будынак на вуліцы Ўладзімера Караткевіча, таму ў 1990 годзе гарэльеф пастанавілі зьмясьціць якраз на ім.

Штогод у дзень народзінаў пісьменьніка сюды прыходзяць землякі, каб ускласьці кветкі.

svaboda.org/аз