У Горадні сарвалі прэзэнтацыю «Мовы»

23 кастрычніка ў Горадні была сарваная прэзэнтацыя новага раману беларускага пісьменьніка і журналіста Віктара Марціновіча «Мова», якая павінна была адбыцца ўвечары ў парафіі Маці Божай Фацімскай на Граднічанскай вуліцы.

Як паведаміў БелаПАН Віктар Марціновіч, у перапоўненую залю, дзе пачыналася сустрэча, прыйшлі супрацоўнікі міліцыі, МНС, гарвыканкаму. Яны заявілі, што мерапрыемства адмяняецца, і прапанавалі пісьменьніку прайсьці зь імі.

Марціновіча апыталі ў сувязі з правядзеньнем сустрэчы і склалі адпаведны пратакол. Ён адзначыў, што ўлады, верагодна, палічылі сустрэчу з чытачамі несанкцыянаванай масавай акцыяй.

Пасьля гэтага Марціновічу далі 10 хвілін на завяршэньне мерапрыемства.

Інцыдэнт адбыўся роўна ў той дзень, калі Аляксандр Лукашэнка сустракаўся зь беларускімі пісьменьнікамі і разважаў пра сучасную беларускую літаратуру.

Нагадаем, Лукашэнка ўчора заявіў, што ў Беларусі няма цэнзуры: «У нашыя дні ніхто не дыктуе, пра што і як пісаць».

Новы беларускамоўны раман Віктара Марціновіча «Мова» — гэта сацыяльная антыўтопія. Дзеяньні раману адбываюцца ў недалёкай будучыні: Расея і Кітай аб'ядналіся ў саюзную дзяржаву і аддзяліліся ад Эўропы сьцяной. Галоўны герой кнігі жыве ў Менску, ён спажывец «мовы» — лінгвістычнага наркотыку, продажам якога займаюцца кітайскія трыяды, але дзейнічае які толькі на «тутэйшых».

Прэзэнтацыя раману адбылася 10 верасьня. Арыгінальны мова «Мовы» — беларуская. Выйшаў таксама пераклад кнігі на расейскую мову.

naviny.by/эб