На затрыманага ў Берасьці актывіста склалі два пратаколы

На затрыманага ў Берасьці 16 студзеня грамадзкага актывіста Андрэя Шарэнду ў міліцыі склалі два пратаколы.

„Мяне затрымалі два супрацоўнікі АМАПа на вуліцы Суворава каля 10.30 у тралейбусе, у якім я ехаў. Яны заявілі, што падобны да чалавека, які ўчыніў правапарушэньне. Затым мяне даставілі ў Маскоўскі РАУС Берасьця”, - паведаміў Шарэнда.

Паводле яго слоў, у міліцыі на яго склалі два пратаколы (за дробнае хуліганства й за парушэньне правілаў добраўпарадкаваньня і ўтрыманьня населеных пунктаў) за тое, што ён нібыта расклейваў улёткі з партрэтамі зьніклых у Беларусі палітыкаў і вядомых людзей.

Каля пяці вечара Шарэнду даставілі ў суд Маскоўскага раёна Берасьця, дзе павінны былі разглядаць яго справу за дробнае хуліганства. Пасьля таго як судзьдзя адправіла матэрыялы на дапрацоўку ў Маскоўскі РАУС, актывіста адпусьцілі.

„Я лічу гэта самавольным затрыманьнем. Такім чынам сілавыя структуры хочуць зьбіць хвалю расклейваньня 16 чысла кожнага месяца на вуліцах горада партрэтаў зьніклых палітыкаў і вядомых людзей”, - заявіў праваабаронца Раман Кісьляк.

БелаПАН/nn.by/аз