На «Беларуськаліі» будаўнікі зьдзейсьнілі асабліва буйны крадзеж

24 лістапада стала вядома, што на ААТ «Беларуськалій» раскрылі асабліва буйны крадзеж, які зьдзейсьнілі службовыя асобы будаўнічай арганізацыі, якая ажыцьцяўляла працы на адным з рудаўпраўленьняў прадпрыемства. Распачата крымінальная справа, паведамілі ва УУС Менскай вобласьці.

Супрацоўнікі АБЭЗ выявілі, што падазраваныя стваралі няўлічаныя лішкі металапракату, выкарыстоўваючы падробленыя дакумэнты, і прадавалі іх камэрцыйнай структуры. Страты ад дзейнасьці будаўнікоў склалі больш 227 мільёнаў рублёў. Таксама быў усталяваны факт крадзяжу металапракату такім жа спосабам на суму 168 мільёнаў рублёў.

У дачыненьні да службовых асоб будаўнічай фірмы распачата крымінальная справа за крадзеж у асабліва буйных памерах.

telegraf.by/ав