За ядзерную энэргетыку ў Мінэнэрга будзе адказваць Палюховіч

Дырэктарам дэпартамэнта па ядзернай энэргетыцы Міністэрства энэргетыкі Беларусі прызначаны Васіль Палюховіч. Такое рашэньне прынятае пастановай Савета міністраў ад 18 жніўня 2016 году № 647, паведаміла прэс-служба ўрада.

Да прызначэньня Васіль Палюховіч займаў пасаду намесьніка дырэктара дэпартамэнта па ядзернай энэргетыцы Мінэнэрга.

Раней пасаду дырэктара дэпартамэнта займаў Станіслаў Чарнавусаў.

Васіль Палюховіч нарадзіўся ў 1957 годзе ў Серніках Зарэчанскага раёна Ровенскай вобласьці. У 1980 годзе скончыў Кіеўскі палітэхнічны інстытут па спэцыяльнасьці „асноўныя працэсы хімічных вытворчасьцяў і хімічная кібэрнэтыка”, у 1986 годзе — асьпірантуру Інстытута ядзернай энэргетыкі Акадэміі навук БССР. Кандыдат тэхнічных навук.

belapan.com/аз