Лідара берасьцейскага «Маршу недармаедаў» пасадзілі на 5 сутак

У судзе Бярозаўскага раёна 9 сакавіка разглядалі адразу тры адміністратыўныя справы супраць Аляксандра Кабанава, фэрмэра, які ўзначальваў акцыі пратэсту супраць Дэкрэта №3 у Берасьці.

Дзьве справы былі зьвязаныя з пратэстамі: ён нібыта парушыў закон аб масавых мерапрыемствах, а таксама лаяўся матам.

Пра выпадак з лаянкай сам фэрмэр распавядаў, што яго справакавалі — раніцай каля яго дома нейкі мужчына пачаў патрабаваць у яго цыгарэту, пасьля грошы, а затым сам аблаяў. Па словах Кабанава, той жа мужчына і напісаў заяву ў міліцыю, гэта быў правакатар. Сьведкамі выступілі міліцыянты, што сядзелі раніцай у машыне ля дома фэрмэра.

Акрамя таго, непасрэдна 9 сакавіка высьветлілася, што разгледзяць яшчэ адну справу. Раней Кабанаў не зьявіўся ў суд па павестцы.

Судзьдзя Натальля Вакульчык вырашыла, што Аляксандр Кабанаў вінаваты толькі ў парушэньні закону аб масавых мерапрыемствах. Вакульчык асудзіла фэрмэра на 5 сутак. Ён быў узяты пад варту ў залі суда.

Такім чынам, Аляксандр Кабанаў не зможа ўзяць удзел ні ў адным з «Маршаў недармаедаў», якія маюць прайсьці ў суботу і нядзелю ў раённых гарадах, у тым ліку ў Пінску.

nn.by/яс