Эколягі пачалі збор подпісаў супраць воднага шляху Е40

Эколягі зь Беларусі, Польшчы ды Ўкраіны пачалі збор подпісаў супраць будаўніцтва воднага шляху Е40. Ён, нагадаем, павінен злучыць Балтыйскае мора з Чорным. Сумесная пэтыцыя аб’яднала каля 20-ці арганізацыяў.

Актывісты занепакоеныя плянамі зьмяніць гідралягічны рэжым Віслы, Мухаўца, Піны, Прыпяці, Дняпра ды Дняпроўска-Бускага каналу, што, паводле спэцыялістаў, пагражае зьнішчэньнем сталых экасыстэмаў. Эколягі сьцьвярджаюць, што праект небясьпечны для больш як сямідзесяці асабліва ахоўных прыродных тэрыторыяў, дзе сустракаюцца рэдкія віды жывёл і расьлінаў.

Небясьпеку бачаць таксама ў тым, што шлях Е40 мусіць праходзіць праз чарнобыльскую зону. Паглыбленьне дна Прыпяці ды інтэнсіўны рух па ёй пагражаюць пад’ёмам радыеактыўнага глею, які можа трапіць па цячэньні ў Кіеўскае вадасховішча, што забясьпечвае пітной вадой мільёны ўкраінцаў.

БелаПАН/св

фота мае ілюстрацыйны характар