Бухгальтар прафсаюза РЭП Ігар Комлік застаецца пад вартай

Менскі гарадзкі суд не знайшоў падстаў для адмены рашэньня аб утрыманьні пад вартай бухгальтара незалежнага прафсаюза РЭП Ігара Комліка.

Касацыйная скарга на рашэньне суда Партызанскага раёна сталіцы аб зьмене меры стрыманьня Комліка разглядалася ў Менгарсудзе 19 верасьня. Такім чынам, прафсаюзны актывіст застанецца пад вартай прынамсі да завяршэньня сьледзтва па крымінальнай справе аб ухіленьні ад выплаты падаткаў у асабліва буйным памеры.

Ігар Комлік знаходзіцца пад вартай ужо больш за месяц. Ён быў затрыманы разам са старшынёй прафсаюза РЭП Генадзем Фядынічам 2 жніўня і дапытаны ў дэпартаманце фінансавых расьсьледаваньняў Камітэта дзяржкантролю. Фядыніча пасьля допыту адпусьцілі, ён знаходзіцца пад падпіскай аб нявыездзе, Комлік быў зьмешчаны ў СІЗА № 1 на вуліцы Валадарскага.

Фядыніч і Комлік праходзяць па крымінальнай справе як падазраваныя, іх абвінавачваюць у нявыплаце падаткаў у асабліва буйным памеры.

Справу ў дачыненьні да кіраўніцтва РЭП праваабаронцы параўналі са справай кіраўніка закрытага ўладамі цэнтра «Вясна» Алеся Бяляцкага, якая была ўзбуджаная ў 2011 годзе.

Праваабарончыя арганізацыі таксама заявілі, што Ігара Комліка лічаць палітвязнем і патрабуюць неадкладнага вызвалення.

navinby.by/spring96.org/яс