БХД заклікае Эўразьвяз да крытычнага дыялёгу зь Беларусьсю

Аргкамітэт па стварэньні партыі «Беларуская хрысьціянская дэмакратыя» «вітае палітыку адкрытасьці Эўразьвязу й дэмакратычных краін да Беларусі, але разам з тым заклікае да правядзеньня крытычнага дыялёгу, заснаванага на каштоўнасьцях і прыярытэце правоў чалавека». Пра гэта гаворыцца ў заяве дэлегатаў зьезда БХД, які прайшоў 23 сьнежня ў Менску.

БХД таксама лічыць неабходным падтрымліваць крытычны дыялёг з прадстаўнікамі беларускіх уладаў «для прасоўваньня дэмакратычных рэформаў, правядзеньня свабодных і справядлівых выбараў у Беларусі», заклікаючы распрацаваць «ясную дарожную карту перамоў Беларусь – Захад з удзелам незалежнага грамадзтва й палітычнай апазыцыі».

У зьезьдзе БХД удзельнічала 110 дэлегатаў з розных рэгіёнаў Беларусі. Па рашэньні зьезду аргкамітэт па стварэньні партыі «Беларуская хрысьціянская дэмакратыя» ў сёмы раз падасьць дакумэнты на афіцыйную рэгістрацыю ў Міністэрства юстыцыі. Раней БХД шэсьць разоў беспасьпяхова спрабавала зарэгістравацца ў Мінюсьце ў якасьці палітычнай партыі.

паводле белапан/вс

фота мае ілюстрацыйны характар