Прафсаюзным лідарам пагражае 5 год зьняволеньня

У судзе Савецкага раёна Менска 17 жніўня прадоўжыўся разгляд крымінальнай справы старшыні Беларускага незалежнага прафсаюза работнікаў радыёэлектроннай прамысловасьці (РЭП) Генадзя Фядыніча і галоўнага бухгальтара прафсаюза РЭП Ігара Комліка. Ім прад’яўлена абвінавачваньне па ч. 2 арт. 243 Крымінальнага кодэкса Рэспублікі Беларусь (ухіленьне ад выплаты сум падаткаў, збораў у асабліва буйным памеры). Працэс вядзе судзьдзя Марына Фёдарава.

Паводле такога ж артыкула ў 2011 годзе судзілі старшыню праваабарончага цэнтра «Вясна» Алеся Бяляцкага. Яго пакаралі 4,5 гадамі зьняволеньня ў калёніі ўзмоцненага рэжыму з канфіскацыяй маёмасьці, а вызвалілі праз 3 гады.

Пракурор Ліліяна Літвінюк папрасіла пакараць Генадзя Фядыніча і Ігара Комліка 5 гадамі абмежаваньня свабоды без накіраваньня ў папраўчую ўстанову, канфіскацыяй маёмасьці і забаронай займаць кіруючыя пасады на працягу 5 гадоў.

Дарэчы, на судовым пасяджэньні 15 жніўня высьветлілася, што тэлефонныя размовы абвінавачаных праслухоўваліся нават падчас судовага працэсу. У сувязі з гэтым Генадзь Фядыніч заявіў у судзе, што праслухоўваньне вялося з парушэньнем закона і ня мае юрыдычнай сілы.

Spring96.org/вк