Палешукі просяць Лукашэнку пакінуць ім возера

Вадаём плянуе далучыць да сваёй тэрыторыі Нацыянальны парк «Прыпяцкі». Шмат хто зь мясцовых жыхароў – супраць. Звароты ў структуры ўлады не прынесьлі плёну. Вяскоўцы напісалі кіраўніку дзяржавы з «надзеяй знайсьці разуменьне, абарону і дапамогу на справядлівасьць».

Калектыўны ліст падпісалі 650 чалавек. «Гэта за адзін дзень. У нас мала часу. Каб быў час – мы бы і тысячы подпісаў сабралі», – пракамэнтаваў Свабодзе жыхар Жыткавічаў Аляксандар.

У звароце адзначана, што возера мае сваіх, мясцовых арандатараў – лясгас і «Жыткавічыхімсэрвіс». Яны арандавалі возера паводле закону, да 2025 году. Толькі траціна возера цяпер ва ўладаньні Нацыянальнага парку. Але ён хоча ўсё возера.

Палешукі выступаюць супраць Нацыянальнага парку ў зьвязку з тым, што парк не рэалізуе мясцовым пуцёўкі на паляваньне, забароніць рыбалку ды агародзіць возера.

У сваю чаргу Нацыянальны парк заяўляе, што хоча навесьці парадак на возеры, але ня можа праз «супрацьдзеяньне мясцовых жыхароў».

Паводле Радыё «Свабода»/юл