Зборнік вершаў Багдановіча на 10 мовах

Вершы Максіма Багдановіча выдадзены на дзесяці мовах сьвету да 120-годзьдзя зь дня яго нараджэньня.

Аб гэтым паведаміў старшыня грамадзкага аб’яднаньня „Беларускі фонд культуры”, які займаўся падрыхтоўкай кніг, Уладзімер Гілеп на паседжаньні рэспубліканскага арганізацыйнага камітэта па правядзеньню мерапрыемстваў да юбілею клясыка.

У сэрыю ўвайшлі тры выданьні, кожнае зь якіх зьмяшчае адзін арыгінальны твор Максіма Багдановіча („Пагоня”, „Слуцкія ткачыхі”, „Раманс”). Вершы перакладзены на балгарскую, летувіскую, латышскую, нямецкую, украінскую, ангельскую й іншыя мовы. Уступнае слова да кніг пад рэдакцыяй Уладзімера Гілепа напісаў міністар культуры Беларусі Павел Латушка.

Выданьню твораў садзейнічалі Міністэрства культуры, менскі Літаратурны музэй М.Багдановіча. Фінансавую падтрымку аказала прыватнае прадпрыемства з Гальшан. Наклад - тысяча асобнікаў.

БелТА /аз