Лукашэнка-малодшы ў Катары

У Катар Віктар Лукашэнка паляцеў для абмеркаваньня пытаньня паставак газу ў Беларусь.

Катар валодае трэцімі па памерах запасамі газу ў сьвеце пасьля Ірану ды Расеі. Беларускія ўлады даўно выказвалі інтарэс да дывэрсіфікацыі паставак газу.
Афіцыйны Менск ужо пачаў рэалізацыю падобных праектаў у нафтавай галіне, наладзіўшы пастаўкі сыравіны з Азэрбайджану ды Вэнэсуэлы.

У 2011 годзе стала вядома, што беларускі ўрад вядзе перамовы зь Летувой наконт будаўніцтва тэрміналу па прыёме звадкаванага газу ў Клайпэдзе. Магчыма тудой і пойдзе катарскі газ.

Апроч энэргетычных справаў, абмяркоўваліся пытаньні катарскіх інвэстыцыіў у Беларусі, паведамляе расейскае агенства «Рэгнум». Як вядома, Аляксандар Лукашэнка загадаў выдзяліць для катарскіх бізнэсоўцаў у Беларусі зоны зь ільготным рэжымам для дзейнасьці фінансавых ды банкаўскіх цэнтраў, у тым ліку ісламскіх структураў.

Менавіта Віктару Лукашэнку даручана каардынаваць працы па выдзяленьні катарскаму боку зямельных надзелаў у Беларусі. Разам зь Віктарам Лукашэнкам ў Катары знаходзіцца намесьнік міністра замежных спраў Беларусі Сяргей Алейнік. Ён сустракаўся зь міністрам энэргетыкі ды прамысловасьці Катару.

У гэты ж час з афіцыйным візытам у Менск прыляцеў міністар замежных справаў Ірану.

юл