Выратавальнікі знайшлі целы загінулых шахцёраў

На 9-ты дзень пошукавай апэрацыі ўдалося знайсьці цела другога з трох загінулых шахцёраў у шахце «Zofiówka» на поўдні Польшчы. Няшчасны выпадак здарыўся ў шахце 5 траўня, у выніку абвалу зямлі ад падземнага штуршку. У суботу вечарам было знойдзена цела першага гарняка, пазьней Ястшэмбская вугальная кампанія паведаміла, што выратавальнікі натрапілі на цела другога гарняка.

Пошукавая акцыя праходзіць у вельмі складаных умовах, паколькі ў выніку штуршку месца здарэньня было затоплена вадой, якую неабходна выпампаваць. Аднак нельга было выкарыстаць дзеля гэтага моцныя электрычныя помпы праз высокі ўзровень канцэнтрацыі мэтану.

У выніку здарэньня загінула агулам пяць чалавек, цела аднаго з іх яшчэ ня знойдзена. Два шахцёры зь лёгкімі раненьнямі былі дастаўленыя ў шпіталь, адкуль выйшлі ў мінулую пятніцу.

Адмысловая камісія, створаная Вышэйшым шахцёрскім упраўленьнем, праводзіць сьледзтва па справе выпадку. Даклад аб прычынах здарэньня павінен быць падрыхтаваны да 10 жніўня. Уласнае сьледзтва ўзбудзіла таксама пракуратура ў Глівіцэ.

Польскае Радыё/нг