Летува: Бяляцкага могуць узнагародзіць прэміяй Свабоды

У Летуве абмяркоўваюць магчымасьць прысуджэньня беларускаму палітвязьню Алесю Бяляцкаму прэміі Свабоды. З такой прапановай да камісіі па прэміі зьвярнуліся Фонд падтрымкі грамадзянскай абароны й Таварыства беларускай культуры ў Леутве.

Прэміяй Свабоды ўзнагароджваюць з мэтай адзначыць дасягненьні асоб і арганізацый і іх унёсак у абарону правоў чалавека, разьвіцьцё дэмакратыі, заахвочваньне міждзяржаўнага супрацоўніцтва ў барацьбе за свабоду самавызначэньня й сувэрэнітэт народаў Усходняй і Цэнтральнай Эўропы.

Прэмію памерам 5 тыс. эўра летувіскі Сэйм заснаваў 15 верасьня 2011 года, прыняўшы спэцыяльны закон.

Першая прэмія Свабоды была прысуджана актыўнаму барацьбіту за волю й дэмакратыю, абаронцу правоў чалавека расейскаму дысыдэнту Сяргею Кавалёву.

Прэмія 2012 года была ўручана былому савецкаму дысыдэнту кіраўніку летувіскай Лігі свабоды Антанасу Цярляцкасу.

БелаПАН/nn.by/аз