Нямецкі дыплямат пачуў прэтэнзіі ад МЗС Турцыі

Нямецкі дыплямат быў выкліканы ў турэцкае Міністэрства замежных спраў. Прычынай стаў факт, што ўлады Нямеччыны не пагадзіліся, каб прэзыдэнт Рэджэп Эрдаган зьвярнуўся пры дапамозе тэлемосту да туркаў, якія прымалі ўдзел у нядзельнай дэманстрацыі ў Кёльне.

У дэманстрацыі падтрымкі прэзыдэнта Турцыі ўдзел прыняло каля 20 тысяч туркаў, якія жывуць у Нямеччыне. Удзельнікі трымалі транспаранты з напісам: «Так для дэмакратыі, не для путчу».

Хвілінай цішыні былі ўшанаваныя ахвяры нядаўняй спробы перавароту ў Турцыі. Нямецкія ўлады аднак не згадзіліся, каб Рэджэп Эрдаган зьвярнуўся да прысутных у прамым тэлеспалучэньні. Улады ў Анкары раскрытыкавалі гэтае рашэньне.

Дэманстрацыя ў Кёльне была вялікім выклікам для службаў, адказных за бясьпеку. Лякальныя ўлады баяліся, што па прычыне напружанай палітычнай сытуацыі ў Турцыі дэманстрацыя можа закончыцца беспарадкамі. Тым больш, што ў горадзе праходзілі контрдэманстрацыі праціўнікаў Рэджэпа Эрдагана.

ав