Гішпанія ня будзе блякаваць уступленьня Шатляндыі ў Эўразьвяз

Гішпанія ня будзе блякаваць уваходжаньня Шатляндыі да Эўразьвязу, калі гэтая частка Вялікабрытаніі захоча стаць незалежнай дзяржавай. Пра гэта заявіў міністар замежных справаў Гішпаніі Альфонса Дасціс у інтэрвію газэце El Pais.

Раней Мадрыд выступаў супраць тэарэтычнага ўваходжаньня незалежнай Шатляндыі ў Эўрапейскі зьвяз, бо асьцерагаўся росту сэпаратысцкіх настрояў у гішпанскай правінцыі Каталёнія.

Працэс выхаду Вялікабрытаніі з Эўрапейскага зьвязу пачаўся на гэтым тыдні. У адказ на рашэньне Лёндану пакінуць Эўразьвяз, рэгіянальны парлямэнт Шатляндыі прагаласаваў за правядзеньне рэфэрэндуму аб выхадзе з Аб’яднанага Каралеўства. Рэфэрэндум мог бы прайсьці напрыканцы 2018 ці на пачатку 2019 году. Брытанскі парлямэнт, аднак, заявіў, што не жадае абмяркоўваць гэтае пытаньне.

IAR/ап