Мігрантаў баіцца той, хто іх ня ведае

Амаль дзьве траціны палякаў лічаць, што эканамічная эміграцыя некарысная для Польшчы. Пра гэта сьведчаць вынікі глябальнага апытаньня „End of Year”. Гэта ўдвая больш чым у сярэднім па сьвеце, паколькі сярод больш чым 68 тыс. рэспандэнтаў з 69 краінаў, ахопленых дасьледаваньнем „Gallup International”, гэткі пункт гледжаньня прадстаўляе толькі 32%, паведамляе тыднёвік „Newsweek”.

Найменш прыхільна да працоўных мігрантаў ставяцца жыхары Заходняй Азіі (66 адсоткаў), а таксама Блізкага Ўсходу й Паўночнай Афрыкі (55 адсоткаў). На трэцім месцы апынуліся Эўропа й Паўднёвая Амэрыка(50 адсоткаў). Далей ідуць Паўночная Амэрыка (37 адсоткаў), краіны Чорнай Афрыкі (33 працэнты), Паўднёвай Азіі (32 адсоткi) і, нарэшце, Усходняй Азіі й Акіяніі (19 адсоткаў).

Аўтары дакладу падкрэсьліваюць, што ў краінах Эўразьвязу працоўную міграцыю, як некарысную для краіны лічаць 52 адсоткі апытаных. У іншых эўрапейскіх краінах гэты паказчык складае 44 адсоткі.

„Тым ня менш усюды міграцыя выклікае вялікія эмоцыі, паколькі гаворка ідзе ня толькі пра эканамічныя пытаньні, але таксама грамадзкія й палітычныя”, - кажа старшыня „Gallup International” Жан-Марк Легер (фран. Jean-Marc Leger).

Паводле Сабіны Кубіцель-Лядзіньскай (поль. Sabina Kubiciel-Lodzińska) з Факультэту эканомікі й мэмэджмэнта Апольскага ўнівэрсытэту, большасьць палякаў успрымае імігрантаў, як канкурэнтаў на рынку працы. Прыхільнасьць да іх расьце сярод тых, хто асабіста ведае хоць аднаго імігранта. У сваю чаргу тыя, хто сам выяжджаў на працу за мяжу прысутнасьць іншаземцаў лічыць карыснай, паведамляе тыднёвік „Newsweek”.

аз