«Антывірус Касперскага» ствараў фальшывыя вірусы

Цягам некалькіх год ён падманваў карыстальнікаў і канкурэнтаў, распавялі Reuters былыя супрацоўнікі «Лябараторыі Касперскага».

Больш за 10 год «Касперскі» пазначаў для канкурэнтаў «здаровыя» файлы як файлы зь вірусамі. Канкурэнты пачыналі ўспрымаць такія файлы як вірусы — і выдаляць іх у карыстальнікаў. Некаторыя атакі санкцыянаваў асабіста заснавальнік кампаніі Яўген Касперскі.

Сьцьвярджаецца, што атака была скіраваная на Microsoft, AVG, Avast і іншых канкурэнтаў «Касперскага». Пік атак прыйшоўся на 2009-2013 гады.

Экс-супрацоўнікі «Касперскага» кажуць, што тыднямі і месяцамі працавалі над тым, каб дасьледаваць працу канкурэнтаў і знайсьці спосаб іх «падставіць». Кампаніі-распрацоўнікі антывірусаў дзеляцца адна з адной інфармацыяй пра вірусныя пагрозы, прадстаўляюць такую інфармацыю ў агульную базу.

Менавіта гэтым, як сьцьвярджаецца, скарысталіся зламысьнікі. Напрыклад, файл драйвэра зь невялікай зьменай трапляў у базу вірусаў — канкурэнты маглі ўспрыняць за вірус і звычайны драйвер, выдаліць яго і нашкодзіць працы камп’ютара.

«Лябараторыя Касперскага» абвяргае факт такіх дзеяньняў, але адзначае, што сутыкалася з пазначэньнем здаровых файлаў як вірусаў. Такія выпадкі пацьвердзілі і яе канкурэнты, але не пракамэнтавалі датычнасьць «Касперскага» да атак. Праз мадэрнізацыю антывірусных алгарытмаў такі тып атак ужо неактуальны.

эб/nn.by