У Польшчы становяцца папулярнымі імітацыі вясельляў

Людзі як правіла любяць бываць на вясельлях. Жыхарка польскага горада Быдгашч Ганна Стэнпень таксама любіць добрую забаву, а калі знаёмыя доўга не запрашалі яе на вясельлі, то яна прыдумала быццам бы вясельле, такая гульня панарошку – чытаем у выданьні «Gazeta Wyborcza».

Першае вясельле Ганна зрабіла для жарту, запрасіла сваіх знаёмых. Не было, канешне, маладой пары, але, акрамя гэтага, усё было як на сапраўдным вясельлі: адпаведная музыка, ежа, забава. Сёлета на вясельле хацела прыйсьці адразу 300 чалавек, прыйшлося зрабіць некалькі імпрэз. «Людзі абажаюць вясельлі», – кажа Ганна.

Вясельле – гэта слова, якое прыцягвае як магніт. Яшчэ нядаўна ў людзей былі дрэнныя асацыяцыі: алькаголь, бойкі, вульгарныя жарты, папса. Цяпер жа многія ходзяць на вясельле, бо яно дае ім магчымасьць добра пагуляць. Альтэрнатыва – карнавальны баль, але ён іншы: трэба падрыхтаваць спэцыяльную вопратку, маску, а забава не такая свабодная, як на вясельлі. «Калі ідзеш на вясельле, то вядома, што ежы будзе столькі, што немагчыма будзе ўсё зьесьці, а музыка будзе адпаведная, каб весела патанцаваць», – гаворыць адна з удзельніц імітацыі вясельля Сыльвія Зімніцка.

Такое вясельле пазбаўленае таксама адмоўных бакоў сапраўднага шлюбу – няма далёкіх сваякоў, з якімі неабходна падтрымліваць размову, ня трэба купляць падарунак для маладых. І прыемна сказаць знаёмым, што ідзеш на вясельле без маладых, а не на баль. На такое вясельле нават можна запрасіць бацькоў, а ў модны клюб яны хутчэй ня пойдуць.

Gazeta Wyborcza/нг