У Судзе ЭЗ пачаліся слуханьні за адмову Польшчы прымаць уцекачоў

Польшча лічыць, што скарга ЭК у дачыненьні да адмовы Польшчы прымаць мігрантаў, пазбаўленая падстаў, паколькі тэрмін дзеяньня нарматыўных актаў ЭЗ па гэтым пытаньні мінуў.

У Эўрапейскім судзе ў Люксембургу пачаліся слуханьні па пазове Эўрапейскай камісіі ў дачыненьні да Польшчы і Чэхіі, якая таксама ня выканала сваіх абавязацельстваў ад восені 2015 года, калі большасьць краін ЭЗ дало згоду на прыём 160 тыс. чалавек з лягераў для бежанцаў у Грэцыі ды Італіі.

Упаўнаважаны ўраду Багуслаў Майчына (Bogusław Majczyna) нагадаў, што праграма прыёму бежанцаў была расьпісана на два гады, а яе тэрмін скончыўся ўвосень 2017 года.

У Эўрапейскай камісіі, аднак, лічаць, што, хоць тэрмін дзеяньня нарматыўных актаў скончыўся, у Грэцыі дагэтуль застаюцца ўцекачы, якія маюць права на перасяленьне ў ЭЗ, паколькі прыбылі ў Эўропу, калі правілы яшчэ дзейнічалі.

яс